But for as muche thou art a worthy knyght
And wilnest to darreyne hire by bataille,
Have heer my trouthe; tomorwe I wol nat faille,
Withoute wityng of any oother wight,
That heere I wol be founden as a knyght,
And bryngen harneys right ynough for thee;
And ches the beste, and leef the worste for me.
And mete and drynke this nyght wol I brynge
Ynough for thee, and clothes for thy beddynge.
And if so be that thou my lady wynne,
And sle me in this wode ther I am inne,
Thow mayst wel have thy lady as for me.
– Geoffrey Chaucer